VOV4.Êđê- Ti tlam mbruê, 6/3, Khua knŭk kna Phạm Minh Chính mbĭt hŏng phung bi ala đa đa phŭn, dhar bruă mâo leh klei mă bruă hŏng khua gĭt gai čar Kiên Giang čiăng ksiêm wĭt boh tŭ klei đĭ kyar bruă duh mkra ala ƀuôn thŭn 2021, 2 mlan akŏ thŭn 2022 leh anăn hdră tă hlăm hruê mmông kơ anăp, hlăm mmông mă bruă, khua bruă Đảng čar Kiên Giang Đỗ Thanh Bình brei thâo, thŭn 2021, čar Kiên Giang ăt msĕ hŏng lu čar mkăn tŭ klei hmăi amâo jăk mơ̆ng klei ruă tưp Covid-19, ƀiădah jih 3 anôk bruă duh mkra ăt mâo klei đĭ kyar (khădah ƀiă) hlăm wưng mâo lu klei dleh dlan. Bruă duh mkra mâo klei đĭ, GRDP đĭ 0,58%. Prăk hrui wĭt mâo êbeh 11 êbâo êklai prăk. Blŭ hlăm mmông mă bruă, Khua knŭk kna Phạm Minh Chính pah mni leh anăn yap yuôm bhăn dŭm boh tu mơ̆ng čar Kiên Giang dưi mâo hlăm hruê mmông êgao, boh nik hlăm bruă gang mkhư̆ klei ruă tưp Covid-19. Khua knŭk kna lŏ ktrâo klă dŭm klei dôk mâo, klei kpăk leh anăn hdră tă đĭ kyar. Khua knŭk kna mtă, čar Kiên Giang čiăng dưi yua grăp klei găl, mmông găl, ai dưi čiăng đĭ kyar, ngă bruă ktang phĭt hĭn, mjing klei lông dlăng jing klei găl, klei dleh dlan jing boh kdrŭt. Mđĭ kyar ktang bruă duh mkra êa ksĭ, mtrŭt mđĭ mkŏ wĭt bruă lŏ hma, kñăm mđĭ kyar dŭm mta bruă tuh tia mâo klei găl, mkŏ mjing klei găl leh anăn wăl djŏ guôp mđĭ kyar bruă duh mkra ala ƀuôn.

Pô mblang: Y-Ƀel Êban