VOV4. Êđê - Tlam mbruê, Khua knŭk kna Phạm Minh Chính leh anăn êpul ngă bruă mơ̆ng knŭk kna mâo leh mmông mă bruă hŏng khua gĭt kmeh gơ̆ng ƀuôn prŏng Đà Nẵng. Khua knŭk kna yap yuôm bhăn leh anăn pah mni dŭm klei gĭr ktưn leh anăn dŭm boh tŭ yuôm bhăn mơ̆ng bruă Đảng, bruă sang čư êa, lĭng kahan leh anăn mnuih ƀuôn sang ƀuôn prŏng Đà Nẵng mâo leh, đru mguôp yuôm bhăn hlăm boh tŭ dưn mbĭt hlăm ala čar, boh nik jing bruă gang mkhư̆, ksiêm dlăng klei ruă tưp leh anăn krŭ wĭt, mđĭ kyar bruă duh mkra ala ƀuôn.

Ti anăp, Khua knŭk kna mñă klă: ƀuôn prŏng Đà Nẵng lŏ dơ̆ng rơ̆ng kơ mnuih mă bruă, kdrăp yua bruă mdrao mgŭn čiăng ngă jăk bruă klam mdrao mgŭn hlăm alŭ wăl, tlŏ mgang vaccine kơ hđeh ti gŭ 5 thŭn hŏng klei êđăp ênang, kreh knhâo mâo, boh tŭ dưn. Hluê ngă jăk, mâo boh tŭ dưn hdră mtrŭn mrô 43-NQ/TW mơ̆ng phŭn bruă kđi čar kơ bruă mkŏ mkra leh anăn mđĭ kyar ƀuôn prŏng Đà Nẵng truh ti thŭn 2030 leh anăn mdră mtrŭn mrô 119/2020/QH14 mơ̆ng bruă kƀĭn ala kơ bruă lông mkŏ mjing bruă sang čư êa ƀuôn prŏng leh anăn đa đa hdră êlan, hdră mtrŭn čiăng mkŏ mjing boh kdrŭt đĭ kyar mrâo.

Y-Bel pô mblang