VOV4.Êđê- Leh hmư̆ klei ksiêm dlăng boh sĭt ti dŭm alŭ wăl, hdră bruă phŭn, aguah hruê 13/3, Khua knŭk kna Phạm Minh Chính lehanăn Êpul mă bruă mơ̆ng Knŭk kna mă leh bruă hŏng phung khua kiă kriê knơ̆ng čar Khánh Hòa. Phung khua kiă kriê dŭm phŭn, dhar bruă gưl dlông brei thâo: Čar Khánh Hoà jing alŭ wăl phŭn, mâo lu klei găl mđĭ kyar bruă duh mkra – ala ƀuôn krĭng Krah kwar Dhŭng lehanăn Lăn dap kngư, ƀiădah ka dưi ba yua jih ôh klei găl mâo anei čiăng mđĭ kyar.

Blŭ hrăm klah čŭn ti anôk mă bruă, Khua knŭk kna  Phạm Minh Chính mñă, Khánh Hòa jing alŭ wăl phŭn hlăm hdră mđĭ kyar bruă duh mkra – ala ƀuôn lehanăn bruă răng mgang klei êđăp ênang mơ̆ng lăn čar, Khánh Hoà brei hyuă kjăp, pŏk hluê ngă tŭ dưn Hdră mtrŭn Klei bi kƀĭn tal XIII mơ̆ng Đảng lehanăn Hdră mtrŭn Klei bi kƀĭn bruă Đảng čar; ba yua, hluê ngă djŏ hdră êlan mtrŭn mơ̆ng Đảng, hdră bhiăn mơ̆ng knŭk kna. Khánh Hoà brei mđĭ lar ai tiê hgŭm mguôp, cŏng pô gĭr ktưn; mđĭ klei đua klam mguôp hŏng bruă ksiêm dlăng; mâo hdră msir tui ksiêm tŭ dưn hdră mă bruă mơ̆ng dŭm gưl./.

Pô mblang: H’Nêč Êñuôl