VOV4.Êđê- Tlam mbruê 19/8, Khua knŭk kna Phạm Minh Chính mă bruă online kơ hdră mđĭ kyar anôk ba čhĭ hŏng anôk bruă bi ala bruă mnia blei Việt Nam ti ala tač êngao. Hlăm klei bi kƀĭn, Khua knŭk kna hŏng Phŭn bruă tuh tia mnia blei, dŭm Phŭn, dhar bruă bi kƀĭn online hŏng bruă mnia blei Việt Nam ti ala tač êngao bi trông dŭm hdră msir mđĭ klei tŭ dưn bruă mnia blei, mđĭ kyar leh anăn bi lu jơr anôk ba čhĭ, ngă djŏ klei čiăng, bruă klam hlăm boh klei mrâo.

Dŭm anôk bruă mnia blei Việt Nam ti ala tač êngao kƀĭn hâo hưn kơ klei găl, klei čiăng dŭm anôk ba čhĭ; dŭm hdră msir čiăng ngă djŏ klei čiăng mơ̆ng anôk ba čhĭ. Hlue si hưn mdah mơ̆ng Phŭn bruă tuh tia mnia blei, thŭn 2021, prăk ba čhĭ mnia blei Việt Nam mâo êbeh 670 êklai USD, ba Việt Nam hlăm top 20 bruă duh mkra mâo hnơ̆ng mnia blei prŏng hĭn dlông rŏng lăn. 7 mlan akŏ thŭn 2022, prăk mnia blei Việt Nam mâo êbeh 433 êklai USD. Đăo knăl jih thŭn, prăk bruă mnia blei srăng mâo hlăm brô 800 êklai USD, ba Việt Nam gĭr ktưn truh top 10-15 bruă duh mkra mâo bruă mnia blei prŏng hĭn dlông rŏng lăn./.

Pô mblang: H’Zawut Ƀuôn Yă