VOV4.Êđê- Aguah mbrue (24/7), hlăm klei nao čuă lehanăn mă bruă ti čar Nghệ An, khua knŭk kna Phạm Minh Chính lehanăn êpul ngă bruă nao čuă lehanăn mă bruă hŏng Knơ̆ng kiă kriê kahan Alŭ wăl 4. Blŭ hrăm tinei, Khua knŭk kna Phạm Minh Chính mñă, “Amâo mâo ôh alŭ wăl kahan mkăn mâo kbut msat phung djiê êngiă lu hĭn êdi. Kahan alŭ wăl 4 năng ngă bi jăk hĭn kơ bruă hdơr knga tla ai, mjing djăp klei găl kơ phung ƀuôn sang, kơ gŏ êsei knŭk kna dlăng ba, nao čuă msat, čuh brui mngưi, bi hdơr kơ phung djiê êngiă”. Hlăm dua klei bi blah kdơ̆ng hŏng Prăng lehanăn Mi lehanăn răng mgang ala čar, hlăm alŭ wăl kahan anei mâo leh 198 êbâo 659 čô êngiă asei, 113 êbâo 597 čô jing kahan êka êkeh, 12 êbâo 316 čô jing amĭ Việt Nam jhŏng ktang; 51 êbâo 286 čô hmăi djŏ mơ̆ng êa drao ruă diosin./.

            Tlam hruê 24/7, Khua knŭk kna Phạm Minh Chính mă bruă hŏng Anôk kriê dlăng bruă Đảng Nghệ An kơ bruă hluê ngă Hdră mtrŭn Klei bi kƀĭn tal XIII mơ̆ng Đảng lehanăn Hdră mtrŭn Klei bi kƀĭn bruă Đảng čar tal XIX, wưng thŭn 2020 – 2025. Hluê klei hưn mơ̆ng čar Nghệ An, 6 mlan akŏ thŭn 2022, hnơ̆ng mâo mnơ̆ng dhơ̆ng kluôm ti alŭ wăl đĭ 8,44% (dôk mrô 2 ti krĭng Dưr kwar krah, tal 18/63 čar, ƀuôn prŏng hlăm gưl dlông). Dŭm hdră bruă krŭ wĭt pral, đĭ 9,22%. Ti knăm anei, phung khua čar Nghệ An hưn hŏng Knŭk kna, Khua knŭk kna kơ bruă mkra mlih hdră čuăl mkă Tač êdeh phiơr prŏng Vinh čiăng mđĭ hnơ̆ng ngă bruă thŭn 2030 mơ̆ng 8 êklăk đĭ truh 12 êklăk čô tuê/thŭn, tui duah phŭn prăk duh mkra êlan êran pral Viêng Chăn - Hà Nội; akâo kơ Khua knŭk kna lehanăn dŭm Phŭn, dhar bruă gưl dlông đru čiu hnô lăn ala, pŏk mlar êlan dơ̆ng prŏng mrô 1, kdrêč găn Nghệ An…

Leh hmư̆ klei blŭ ti knăm anei, Khua knŭk kna Phạm Minh Chính lač klă, brei čar ksiêm dlăng jih hdră duh bi liê, ruah hdră phŭn, tŭ dưn, ya bruă ngă hlŏng bi leh bruă anăn. Jak iêu hdră duh bi liê mâo lu klei mlih mrâo, ƀiădah ka mâo anôk bruă duh mkra prŏng hriê duh bi liê… Hlăm wưng ti anăp, Nghệ An brei bi mlih klei mĭn, hdră êlan phŭn, ba yua jih klei găl mâo, iêu mtrŭt djăp ai dưi, klei mâo djŏ hdră bhiăn mơ̆ng yang ƀuôn, mnuih ƀuôn sang čiăng mđĭ kyar./.

Pô mblang: Y-Khem Niê