. Blŭ hrăm ti anôk bi tuôm, Khua knŭk kna Phạm Minh Chính bi êdah klei mơak, lehanăn mgei ai tiê mâo bi tuôm hŏng phung mah jiăng jĕ giăm êdi hŏng mnuih ƀuôn sang Việt Nam, phung lŏ dơ̆ng čuê lehanăn rông ba, lehanăn amâo mâo mdei dưi thiăm mbŏ, duh myơr kơ klei bi mguôp dua nah Việt Nam – Dhŭng Korea hlăm êbeh 30 thŭn.

Bi ala kơ knŭk kna, Khua knŭk kna lač jăk kơ dŭm êpul bruă, mnuih, jing phung mah jiăng Dhŭng Korea jih ai tiê sĭt suôr sa ai đru kơ Việt Nam; lŏ mñă klei khăp prŏng prĭn mơ̆ng mnuih ƀuôn sang Việt Nam, êpul khua bi ala mơ̆ng Việt Nam hŏng lăn čar lehanăn mnuih ƀuôn sang Dhŭng Korea. khua knŭk kna lač, Đảng, knŭk kna Việt Nam jih ai tiê dlăn yuôm klei bi mguôp hŏng Dhŭng Korea. Hŏng hdră mă bruă tui hlue klei bhiăn êngiê hlăm klei bi mguôp, čŏng ruah, nao hlăm klei êđăp ênang, hgŭm mbĭt, hgŭm bruă lehanăn mđĭ kyar hlăm djăp mta, Việt Nam yap yuôm klei bi mguôp kjăp nanao hŏng Dhŭng Korea, lehanăn čang hmăng klei bi mguôp dua nah lŏ mâo klei đĭ kyar kjăp hĭn, bi năng hŏng klei găl mơ̆ng hdră êlan bi hgŭm dua nah./.