Hlăm ka bŏ tlâo hruê, Khua knŭk kna gĭt gai, nao hlăm brô 40 bruă ngă, mâo dŭm klei bi kƀĭn mơ̆ng Klei bi kƀĭn gưl dlông G7 pŏk mlar, dŭm klei bi trông hŏng phung khua gĭt gai Japon, phung khua êmua, anôk bruă duh mkra, ala čar Japon leh anăn klei bi trông, bi tuôm hŏng khua gĭt gai dŭm ala čar leh anăn dŭm êpul bruă dlông rŏng lăn.

 Hŏng Japon, dŭm klei bi trông mơ̆ng Khua knŭk kna hŏng Khua knŭk kna Japon, khua gĭt gai čar Hiroshima leh anăn lu phung khua êmua Japon đru mđĭ hĭn klei đăo knang kđi čar, mđĭ ktang klei bi hgŭm êlam Việt Nam -Japon. Khua knŭk kna Phạm Minh Chính ăt mâo leh dŭm pluh klei bi tuôm dua nah hlăm ai tiê pŏk mlar, klă mngač hŏng jih jang phung khua gĭt gai G7, dŭm ala čar jăk iêô, dŭm êpul bruă lu ala čar čiăng bi trông kơ dŭm hdră msir klă klơ̆ng, sĭt nik mđĭ klei bi hgŭm dua nah leh anăn mđĭ bi hgŭm hlăm  dŭm bruă hdơ̆ng bi mđing./.