VOV4.Êđê- Aguah mbruê 10/10, Hruê mlih mrô ala čar mkŏ mjing leh ti anôk bi kƀĭn ala čar hŏng klei nao hgŭm mơ̆ng Khua knŭk kna Phạm Minh Chính leh anăn mơĭt klei hâo hưn mơ̆ng knŭk kna kơ bruă mtrŭt mđĭ klei mlih mrô ala čar. Blŭ hlăm knăm anăn, Khua knŭk kna mñă klă, Đảng, knŭk kna dlăng yuôm bhăn bruă mlih mrô jing sa hlăm dŭm bruă klam hlăm klei mđĭ kyar, bi mrâo mrang ala čar. Hră mtrŭn mơ̆ng klei kƀĭn Prŏng tal 13 mơ̆ng Đảng ăt bơ̆k bâo kơ bruă mlih mrô, bruă duh mkra mrô, yang ƀuôn mrô hlăm dŭm mta kñăm, klei mĭn leh anăn hdră mđĭ kyar.

Hdră mtrŭn mơ̆ng phŭn bruă kđi čar mñă klă leh klei năng mjêč hlăm bruă mlih mrô. Hdră mlih mrô ala čar truh ti thŭn 2025, tă hdră truh ti thŭn 2030 mơ̆ng knŭk kna hluê si êlan mlih mrô hŏng klei kluôm ênŭm, hŏng klei nao hgŭm mơ̆ng mnuih ƀuôn sang, êpul êya knơ̆ng bruă leh anăn anôk bruă knŭk kna.

Pô mblang: Y-Ƀel Êban