Ti mtrŭt mjhar, khua knŭk kna Phạm Minh Chính mñă, hlăk dôk hdĭp, khua gĭt gai Hồ Chí Minh mâo nanao ai tiê duh mĭn kơ mnuih ƀuôn sang, lehanăn mnuih ngă bruă, hŏng ai tiê klei thâo khăp. Mâo klei ñu mđing, tui si dŭm gưl phung khua kiă kriê Đảng, knŭk kna lŏ čuê nanao, kiă kriê, gĭt gai leh lu klei bhiăn hdră êlan mđĭ kyar êpul mnuih ngă bruă.

Hlăm wưng kơ anăp, Khua knŭk kna mtă brei mđing hmư̆, bi đru klam jih ai tiê mghaih msir klei dleh dlan, klei gun kpăk rơ̆ng kơ klei dưi êngiê djŏ klei bhiăn kơ mnuih ngă bruă. Khua knŭk kna mtă kơ dŭm phŭn dhar bruă, alŭ wăl, lehanăn êpul hgŭm kiă kriê mnuih ngă bruă mâo bruă klam kjăp đru mđĭ kyar klei hdĭp mnuih ngă bruă, mkŏ mjing bruă brei čan prăk truh 120.000 êklai prăk kơ bruă mkra sang dôk, sang kơ mnuih ngă bruă. Lehanăn khua knŭk kna mtă, pral bi mâo hdră êlan mđĭ hnơ̆ng kjăp klei thâo ngă bruă ala čar, mđĭ klei thâo ngă bruă kơ mnuih ngă bruă./.