Bi trông hŏng Khua knŭk kna Phạm Minh Chính, Per kriê dlăng krĭng đăo Giuse Nguyễn Văn Phong (Krĭng đăo Bắc Giang) brei thâo, hlăm dua thŭn êgao, alŭ wăl Bắc Giang jăk, mnuih ƀuôn sang hlăm anăn mâo phung khop hơ̆k mơak kyua klei hdĭp mnơ̆ng dhơ̆ng, ai tiê dưi mđĭ, boh nik dưi drông Khua knŭk kna nao hơêč hmưi Noel thŭn 2023.

Blŭ hrăm tinei, Khua knŭk kna Phạm Minh Chính mñă klă, Đảng, Knŭk kna mpŭ kơ klei đăo mnuih ƀuôn sang, hlăm anăn mâo đăo Khop. Ñu lač klă, Bắc Giang jing čar tuôm hŏng lu klei dleh dlan hlăm gưl klei ruă tưp Covid-19, ƀiădah čar mkhư̆ jăk, kơrŭ wĭt leh anăn đĭ kyar pral. Ai êwa Noel ti krĭng đăo hơ̆k mơak, čang hmăng ti gŭ klei gĭt gai mơ̆ng Đảng, Knŭk kna, mnuih ƀuôn sang gĭr ktưn hlue ngă jăk djăp hdră êlan mơ̆ng Đảng, hdră bhiăn Knŭk kna. Khua knŭk kna Phạm Minh Chính hơêč hmưi kơ phung đăo Khop Bắc Giang sa yan Noel suaih pral, jăk mơak, sa thŭn mrâo êđăp ênang./.