Hlăm gưl nao čhưn klă sĭt ti Dhŭng Korea tal anei, mĭn tĭng Khua knŭk kna Phạm Minh Chính srăng mâo êbeh 30 bruă ngă.

Êngao kơ dŭm hdră klă sĭt hŏng Khua gĭt gai gưl dlông Dhŭng Korea, Khua knŭk kna Phạm Minh Chính srăng nao leh anăn blŭ hrăm hlăm 3 klei bi kƀĭn, mâo Klei bi kƀĭn bruă duh mkra, klei bi kƀĭn mtrŭt mjhar hiu čhưn ênguê leh anăn klei bi kƀĭn bi hgŭm dhar kreh, klei bi kƀĭn mnuih mă bruă Việt Nam - Dhŭng Korea; leh anăn 2 klei bi trông, mâo Klei bi trông hŏng khua gĭt gai dŭm Êpul bruă duh mkra Dhŭng Korea leh anăn klei bi trông hŏng phung kreh knhâo Dhŭng Korea kơ bán dẫn leh anăn klei thâo anak mnuih. Khua knŭk kna ăt mâo klei drông pô bi ala dŭm Êpul grup duh mkra mrô sa Dhŭng Korea dôk bi liê ti Việt Nam.