VOV4.Êđê- Tlam mbrue (19/7), ƀri bi hdơr 75 thŭn hrue kahan êka êkeh, phung êngiă asei, khua knŭk kna Phạm Minh Chính nao čuă lehanăn mđup brei leh mnơ̆ng kơ phung kahan êka êkeh ti anôk rông ba kahan êka êkeh Kim Bảng, čar Hà Nam. Bi ala kơ Đảng, knŭk kna lehanăn hŏng ai tiê klei khăp mơ̆ng Khua knŭk kna mơĭt truh leh hŏng phung kahan êka êkeh, kahan ruă duam, mnuih mâo bruă tŭ dưn hŏng cách mạng hlăm kluôm ala, lehanăn phung dôk mdrao mgŭn rông ba ti anôk rông ba kahan êka êkeh Kim Bảng, mâo klei čuă êmuh mđĭ ai hŏng klei khăp hĭn.

 Khua knŭk kna mơak leh thâo Anôk bruă anei ară anei jing leh sang h’uh mđao kơ 77 čô kahan êka êkeh, kahan ruă duam amâo mâo suaih mơ̆ng 81% kơ dlông, 35 čô jing găp djuê mnuih mâo bruă tŭ dưn.

Ƀri wưng anei, Khua knŭk kna mtă kơ phŭn bruă mnuih ngă bruă, phung knap mñai, lehanăn dŭm anôk bruă djŏ tuôm nga jăk hĭng hdră êlan đru kơ mnuih mâo bruă tŭ dưn hŏng cách mạng, bi klă bruă đru ba kơ digơ̆ jing bruă klam năng ngă nanao mơ̆ng jih bruă kđi čar lehanăn kluôm yang ƀuôn./.

Pô mblang: Y-Khem Niê