VOV4.Êđê - Lŏ hlăm hdră hiu čuă čhưn mđĭ ai, hơêč hmưi tết ti čar Thanh Hoá ƀri wưng tết Nhâm Dần 2022, aguah mbrue (25/1), Khua knŭk kna Phạm Minh Chính lehanăn êpul ngă bruă mơ̆ng gưl dlông nao čuă, hơêč hmưi tết, blŭ hrăm hŏng ƀĭng hgŭm hlăm êpul Hàm Rồng. Anei jing anôk mâo lu phung knuă druh cách mạng khua thŭn, phung khua kiă kriê, čar, ƀuôn prŏng lehanăn gưl dlông mơ̆ng Đảng lehanăn bruă sang čư̆ êa, êpul êya lĭng kahan leh wĭt mdei ti ƀuôn prŏng Thanh Hoá. khua knŭk kna mtă kơ čar Thanh Hoá lŏ dơ̆ng mjing djăp klei găl kơ Êpul hgŭm ngă bruă mâo klei tŭ jing, dưn yua jih knhuah gru jăk siam pô đưm, đru kơ čar Thanh Hoá đĭ kyar, jing čar ba akŏ hlăm djăp mta, đru rŭ mdơ̆ng lăn čar jhŏng ktang mdrŏng sah, phung ƀuôn sang trei mđao, jăk yâo. Khua knŭk kna mta êlâo hĭn, dŭm gưl bruă Đảng, bruă sang čư̆ êa lehanăn dŭm dhar bruă djŏ tuôm bi duh mĭn tết kơ phung ƀuôn sang, lehanăn mnuih ngă bruă mâo sa yan tết êđăp ênang h'uh mđao, mkiêt mkriêm lehanăn bŏ hŏng klei jăk./.

Y-Khem pô mblang