Mprăp drông tết nguyên đán, hlăm wưng êgao, Anôk bruă duh mkra Nghi Sơn leh anăn dŭm anôk bruă tuh tia mđup brei leh kơ phung đoàn viên, mnuih mă bruă êbeh 7.300 hnư mnơ̆ng hŏng ênoh jih jang êbeh 4 êklai 500 êklăk prăk. Blŭ hrăm tinei, Khua knŭk kna Phạm Minh Chính mơĭt kơ jih jang phung knuă druh, phung mă bruă, bi ala dŭm gŏ sang knŭk kna dlăng ba, gŏ sang mâo klei hdĭp dleh dlan klei êmuh hrăm leh anăn klei hơêč hmưh jăk siam hĭn.

Khua knŭk kna mñă klă, hŏng klei mĭn dlăng kơ anak mnuih jing mta kñăm, jing phŭn, jing boh kdrŭt, ai dưi đĭ kyar. Đảng, knŭk kna mâo nanao klei uêñ mĭn kriê dlăng čiăng kơ mnuih ƀuôn sang mâo klei hdĭp trei mđao hĭn. Khua knŭk kna hmăng hmưi phung ƀun ƀin, giăm ƀun čiăng bi lar hĭn klei mĭn čŏng pô leh anăn klei hmăng hmưih gĭr ktưn kpưn đĭ tlaih mơ̆ng klei ƀun ƀin hŏng klei kjăp. Ayŏng amai adei mnuih mă bruă mâo klei gĭr mă bruă knuă, găn klei dleh dlan bi hơĭt klei hdĭp.