Khua knŭk kna nao čuă leh dŭm anôk bruă duh mkra mnia mblei ti wăl duh mkra Nhơn Hội lehanăn mđĭ ai mnuih ƀuôn sang ti să Đề Gi, kdrŭn ksĭ Đề Gi, krĭng mkŏ anôk dôk mrâo An Quan hmăi mơ̆ng angĭn êbŭ mrô 13 ngă. Nao čuă wăl duh mkra Nhơn Hội, Khua knŭk kna mtă kơ čar iêu ba djăp klei găl mâo, êpul mnuih, kdrăp mnơ̆ng nao huai mdoh anôk hmăi mơ̆ng klei angĭn êbŭ ngă, krŭ wĭt hdră duh mkra, mnia mblei, bi hơĭt bruă mă kơ mnuih ngă bruă.

Khua knŭk kna brei thâo, gĭt gai leh knơ̆ng prăk brei mkŏ mjing dŭm hdră brei čan prăk, bi hrŏ ênoh prăk mnga đru kơ anôk bruă duh mkra bi hrŏ klei luič liê; anôk bruă Ngăn prăk ksiêm dlăng, brei mâo hdră mtrŭn bi hrŏ jia, prăk tăk, gĭr krơ̆ng klei hdĭp hơĭt kjăp kơ mnuih ƀuôn sang. Nao čuă dŭm gŏ sang hmăi mơ̆ng klei êa ksĭ đĭ, luič liê ti să Đề Gi, Khua knŭk kna mtă kơ dŭm gưl bruă Đảng, bruă knŭk kna, dŭm êpul lĭng kahan, kahan ksiêm ti alŭ wăl nao đru kơ mnuih ƀuôn sang huai mdoh, mkỉa pưk sang, boh nik bi hơĭt hdră duh ƀơ̆ng kơ mnuih ƀuôn sang, krŭ wĭt hdră duh mkra mnia mblei, đru kơ mnuih ƀuôn sang dưi čan prăk hŏng ênoh prăk mnga hdjul, mkăp ana mjeh mnơ̆ng pla, mnơ̆ng rông, boh nik mjeh hdang. Khua knŭk kna čang hmăng mnuih ƀuôn sang mđĭ lar ai tiê čŏng pô, gĭr hgao jih klei dleh dlan, gĭr ktưn kpưn đĭ hlăm klei hdĭp. Ƀri bi hdơr 95 thŭn Hruê knhuah Anôk bruă mặt trận djuê ana hluh lir Việt Nam, ară anei jing mặt trận čar kwar Việt Nam, Khua knŭk kna Phạm Minh Chính nao leh ti Hruê mơak Bi hgŭm mguôp jih jang djuê ana hŏng mnuih ƀuôn sang ti krĭng mnuih ƀuôn sang dôk Thắng Kiên, să Đề Gi, čar Gia Lai. Mñă klă hdră mkŏ mjing, bi kjăp klei bi hgŭm mguôp, mđĭ ai mnuih ƀuôn sang, bi đru hdơ̆ng găp hgao jih klei dleh dlan, Khua knŭk kna brei thâo “Knŭk kna đru mbĭt, alŭ wăl đru mbĭt, mnuih ƀuôn sang bi đru mbĭt mơh”, hgŭm kngan ngă bruă, msir mghaih klei dleh dlan, lông dlăng, mđĭ lar klei găl mâo, dưn klei yâo mơak mbĭt. Hlăm yang hruê, Khua knŭk kna Phạm Minh Chính nao čuă, mđĭ ai, mă bruă hŏng Lĭng kahan răng mgang knông lăn čar Gia Lai./.