VOV4.Êđê -  Aguah mbruê 26/1, Khua knŭk kna Phạm Minh Chính nao hgŭm hlăm knăm ba yua kban Cửa Lục 1 leh anăn êlan ktuê hang êa ksĭ Hạ Long – Cẩm Phả wưng tal 1. Hdră mkŏ mkra anei kčưm ngă mơ̆ng hruê 28/4/2020, mkŏ mjing 6 êlan êdeh, mâo boh taih 4265m, hŏng kluôm ênoh duh bi liê êbeh 2.100 êklai prăk. Êlan anei mkŏ 2 ƀuôn prŏng Hạ Long - Cẩm Phả leh anăn lŏ mkŏ 2 wăl knhuah gru Vịnh Hạ Long - Bái Tử Long, mkŏ mjing klei găl hlăm klei êrô êbat, klei êđăp ênang kơ mnuih ƀuôn sang. Mbĭt anăn đru ba yua djŏ guôp klei găl yua lăn hlăm alŭ wăl êlan anei găn nao, mkŏ mjing klei găl mđĭ kyar bruă mnia mblei, hiu čhưn ênguê, mkŏ mjing lu tač hô̆ pui leh anăn wăl ƀuôn prŏng ktuê êlan anăn. Blŭ hlăm knăm anăn, Khua knŭk kna Phạm Minh Chính mnă klă, hdră mkŏ mkra anei jing boh kdrŭt kñăm kơ čar Quảng Ninh leh anăn dôk dưi hur har mkŏ mjing, bi klă boh tŭ dưn mơ̆ng čar hlăm bruă tui ngă dŭm hdră êlan êdah kdlưn kơ bruă mđĭ kyar bruă mkŏ mkra êlan klông, mrâo mrang, rơ̆ng dưi mkŏ kluôm ênŭm, mđĭ kyar klei bi mguôp hlăm lu alŭ wăl.

Y-Ƀel pô mblang