VOV4.Êđê - Mmăt hruê 20/1, ti Hà Nội, Khua knŭk kna Phạm Minh Chính nao hgŭm hlăm knăm mđup brei klei pah mni klei kreh knhâo, mrâo mrang VinFuture Prize tal 1. Knăm anei mâo klei nao hgŭm mơ̆ng lu phung mâo êdah kdlưn dlông rŏng lăn leh anăn ba mdah lu klei kčĕ, klei mkra mjing mâo klei hmăi jăk truh kơ dŭm êklăk čô leh anăn srăng ba Việt Nam jing mta kñăm mơ̆ng phung kreh knhâo, tar rŏng lăn srăng mđing truh kơ Việt Nam. Knăm anei đru mdưm Việt Nam jing anôk truh mrâo mơ̆ng bruă kreh knhâo tar rŏng lăn, mbĭt anăn jing klei găl bi mguôp, mkŏ mjing klei bi mguôp klă anăp, lu êlan plah wah phung kreh knhâo tar rŏng lăn leh anăn Việt Nam. Mơ̆ng phŭn klei bi lông tal êlâo, VinFuture dưi mâo leh klei mđing mơ̆ng êpul êya phung kreh knhâo tar rŏng lăn hŏng êbeh 1 êbâo 200 klei bi klă hriê mơ̆ng 654 sang hră gưl prŏng, 51 klei ksiêm duah êdah kdlưn , 42 anôk bruă klei kreh knhâo ala čar mâo klei đăo knang hlăm dlông rŏng lăn. Klei bi lông anei tŭ mă leh 599 hdră mkăp bi lông.

Y-Ƀel pô mblang