VOV4.Êđê - Aguah mbruê 10/3, ti anôk bi kƀĭn ala čar, ƀuôn prŏng phŭn Hà Nội, klei kƀĭn kluôm phung bi ala mniê kluôm ala tal 13, wưng thŭn 2022 – 2027 klă klơ̆ng pŏk kčưm hŏng 959 čô phung bi ala klă klơ̆ng, bi ala kơ dŭm dưi phung mniê hlăm kluôm ala. Khua knŭk kna Phạm Minh Chính nao hlăm klei kƀĭn anăn.

Blŭ hlăm klei kƀĭn, Khua knŭk kna Phạm Minh Chính mñă klă, hlăm kluôm boh sui hƀuê ênuk mkŏ mjing ala čar leh anăn răng mgang ala čar, hlăm hruê hruê mmông leh anăn grăp wưng, hŏng klei jhŏng, klei thâo mĭn, klei gĭr ktưn, klei thâo khăp, thâo pap, phung mniê Việt Nam dưi găn leh grăp klei truh, klei kpăk gun, mâo dŭm klei đru mguôp prŏng prĭn, đru mkŏ mjing leh anăn răng mgang ala čar Việt Nam. Čiăng dưi ngă dŭm mta kñăm mđĭ kyar ala čar hlăm hruê mmông kơ anăp, Khua knŭk kna mtă, čiăng bi lar hĭn ai ktang mơ̆ng klei bi mguôp djuê ana, hlăm anăn mâo bruă klam yuôm bhăn mơ̆ng phung mniê. Khua knŭk kna mâo klei sa ai hŏng hdră tă, bruă klam wưng păn bruă thŭn 2022 – 2027, dŭm mta kñăm, bruă êdah êdi leh anăn dŭm bruă klam kñăm ba mdah leh hlăm klei hưn mdah ti klei kƀĭn anei.

Y-Ƀel pô mblang