Klei bi kƀĭn hưn mdah hdră kčah leh anăn mtrŭt mjhar duh bi liê ƀuôn prŏng Cần Thơ jing klei yuôm bhăn hŏng bruă pŏk ngă hdră čuăl mkă ƀuôn prŏng, iêô mkrum klei găl, iêô jak duh bi liê, mđĭ kyar bruă duh mkra ala ƀuôn mơ̆ng Cần Thơ hlăm wưng kơ anăp.

Khua knŭk kna Phạm Minh Chính bi mni leh anăn hơêč hmưi kơ ƀuôn prŏng Cần Thơ mjêč mkŏ mjing, bi leh, hưn hŏng Khua knŭk kna mtrŭn leh anăn hưn mdah Hdră čuăl mkă ƀuôn prŏng wưng 2021 - 2030, hnơ̆ng trah dlăng truh thŭn 2050 hlăm Klei bi kƀĭn anei. Hŏng hdră čuăl mkă ƀuôn prŏng Cần Thơ Khua knŭk kna bi mklă, Cần Thơ jing sa hlăm dŭm alŭ wăl mâo klei mđing dlăng, bi liê prŏng mơ̆ng Đảng, Knŭk kna, mâo klei bhiăn hdră êlan đru djăp ênŭm, hrăm mbĭt, găl ênưih, mâo hdră čuăl mkă kluôm ênŭm./.