Khua knŭk kna nao hlăm klei bi kƀĭn WEF Davos tal anei jing yuôm bhăn hlăm lu mta bruă. Bruă ngă tinei, mĭn tĭng Khua knŭk kna srăng nao leh anăn blŭ hrăm hlăm dŭm klei bi trông yuôm bhăn, hlăm anăn mâo đa đa klei bi kƀĭn yuôm bhăn hjăn kơ Việt Nam, gĭt gai lu klei bi trông hŏng khua gĭt gai dŭm êpul grup mrô sa, bi tuôm hŏng khua gĭt gai dŭm ala čar, dŭm êpul bruă lu ala čar leh anăn anôk bruă duh mkra.

Anei ăt jing gưl čiăng kơ Việt Nam mđĭ klei bi trông, mđĭ klei bi hgŭm hŏng Switz leh anăn dŭm ala čar hgŭm, dŭm êpul bruă dlông rŏng lăn, bi êlam hĭn klei bi hgŭm hlăm lu mta bruă, boh nik kơ bruă duh mkra - mnia blei- bi liê, lŏ dơ̆ng pŏk ngă tŭ dưn bruă hŏng tač êngao mơ̆ng Klei bi kƀĭn Đảng kluôm ala tal 13. Khua knŭk kna Phạm Minh Chính srăng mâo dŭm klei bi trông, bi tuôm, mă bruă hŏng phung khua gĭt gai gưl dlông mơ̆ng Hungary leh anăn Romania.