Anei jing klei blŭ hrăm mâo WEF mkŏ mjing hlăm klei kƀĭn trông, kñăm kah mbha klei hriăm mơ̆ng Việt Nam msĕ si sa klei bi hmô kơ bruă krŭt wĭt bruă duh mkra leh anăn dôk mtrŭt mđĭ mlih klei bi hmô đĭ kyar, mkŏ mjing klei găl čiăng bi trông kơ dŭm hdră tă, hdră êlan leh anăn wăl duh bi liê – mnia mblei ti Việt Nam. Blŭ hlăm klei kƀĭn trông, Khua knŭk kna Phạm Minh Chính hưn mdah kơ boh sĭt klei đĭ kyar bruă duh mkra – ala ƀuôn Việt Nam, mñă klă jing anôk bruă duh mkra mâo hnơ̆ng pŏk mlar ktang, khădah dôk hlăm wưng dleh dlan, ƀiădah Việt Nam dưi bi mdrơ̆ng tŭ dưn hŏng dŭm klei amâo mâo jăk, klei lông dlăng mơ̆ng tač êngao, rơ̆ng klei hơĭt bruă duh mkra, ksiêm dlăng klei prăk luč ênoh leh anăn rơ̆ng dŭm klei bi kna, mtrŭt mđĭ klei đĭ kyar, bi kjăp bruă lĭng kahan, răng mgang klei êđăp ênang kơ klei đĭ kyar. Việt Nam dôk mlih mrâo dŭm klei bi hmô đĭ kyar, mkŏ wĭt bruă duh mkra, mtrŭt mđĭ klei mlih mrâo leh anăn mlih mrô, mtrŭt mđĭ bruă mlih pui kmlă, mđĭ kyar bruă duh mkra mtah, bruă duh mkra dar. Khua knŭk kna mñă kơ WÈ leh anăn phung hgŭm lŏ dơ̆ng bi mguôp, đru kơ Việt Nam kơ kdrăp mrâo mrang, ngăn prăk, mtô mjuăt mnuih mă bruă hnơ̆ng tŭ jăk, pô kiă kriê mrâo mrang.

Ăt hlăm tlam mbruê, Khua knŭk kna  Phạm Minh Chính drông leh Robert H. McCooey, Jr, K’iăng Khua êpul grup Nasdaq (Mi).  Khua knŭk kna bi mni klei mđing dlăng mơ̆ng Nasdaq hŏng anôk bruă Việt Nam, čang hmăng Nasdaq bi trông, kah mbha hŏng Việt Nam kơ hdră êlan ngăn prăk dŭm ala čar prŏng, hdră bruă ngăn prăk kluôm rŏng lăn, klei hâo hưn leh anăn kah mbha klei thâo đru mđĭ kyar anôk ba čhĭ hlăm ala čar, lŏ dơ̆ng hrăm mbĭt mđĭ kyar mơ̆ng dŭm anôk bruă duh mkra Việt Nam.
K’iăng khua gĭt gai Nasdaq bi mni kơ boh tŭ kơrŭ wĭt leh anăn mđĭ kyar bruă duh mkra Việt Nam, bi mni kơ hdră gĭt gai ngăn prăk mơ̆ng Knŭk kna, đăo knang hlăm klei đĭ kyar pral kdal mơ̆ng anôk bruă duh mkra Việt Nam; ƀuăn rơ̆ng đru kơ dŭm anôk bruă duh mkra Việt Nam kơ kluôm rŏng lăn. K’iăng Khua Nasdaq čiăng dưi drông Khua knŭk kna nao dlăng anôk bruă ngăn prăk Nasdaq hlăm wưng hnưm hĭn./.

Ăt hlăm klei kƀĭn trông WEF Thiên Tân, tlam mbruê, Khua knŭk kna Phạm Minh Chính drông čhưn leh Nai prŏng Klaus Schwab, Pô mkŏ mjing hŏng păn ngă Khua gĭt gai WEF leh anăn ktuê dlăng knăm bi klă hdră bi hdơr bi mguôp (MOU) Việt Nam – WEF wưng thŭn 2023 – 2026. Khua knŭk kna mñă klă Việt Nam srăng lŏ nao kjăp hŏng mta kñăm bi hơĭt bruă duh mkra hnơ̆ng prŏng leh anăn mtrŭt mđĭ klei đĭ kyar. Khua knŭk kna mñă kơ WEF lŏ dơ̆ng hrăm mbĭt hŏng Việt Nam, đru mkŏ hŏng dŭm knơ̆ng bruă ƀĭng hgŭm hlăm WEF, đru kơ Việt Nam iêo jak phung duh bi liê hnơ̆ng tŭ jăk, boh nik hlăm dŭm mta bruă mrâo mrang, mlih pui kmlă, mlih mrô, bruă mkŏ mkra hdră êlan leh anăn mđĭ hĭn klei bi trông. Khua knŭk kna ăt mñă kơ WEF kah mbha kơ hdră êlan mơ̆ng tar rŏng lăn, đru kčĕ hdră êlan đru kơ Việt Nam dưi mđĭ ai bi ktưn, bi hơĭt wăl duh bi liê mnia mblei, djŏ guôp hŏng dŭm klei čuăn, hdră tă mrâo.