VOV4.Êđê- Blŭ hlăm klei kƀĭn bruă duh mkra êpul, êpul bi mguôp thŭn 2022 hŏng akŏ “Mlih mrô – boh kdrŭt mđĭ kyar bruă duh mkra êpul, êpul bi mguôp hlăm wưng mrâo nao mbĭt hŏng bruă hluê ngă hdră mtrŭn mrô 20- NQ/TW” mkŏ mjing aguah mbruê 23/9, Khua knŭk kna Phạm Minh Chính lač klă, bruă mlih mrô jing hnơ̆ng čoh čuăn hlăm klei đĭ kyar, bruă duh mkra êpul, êpul bi mguôp amâo dưi amâo ngă, amâo dưi dôk ti tač, kyuanăn, drei srăng mlih mrâo klei mĭn, kčưm mơ̆ng klei thâo săng, mâo hdră trăh dlăng kluôm ênŭm, srăng mtrŭt mđĭ klei dưn yua kdrăp mrâo mrang, klei hưn mthâo mrâo mrang, mtrŭt mđĭ klei mlih mrâo, iêo mthưr grăp ai dưi, mkŏ mjing boh kdrŭt, hmao leh anăn hrăm mbĭr hŏng alŭ wăl bruă duh mkra mkăn.

Klei kƀĭn dưi mkŏ mjing hŏng êlan online leh anăn klă anăp, phung bi ala bi trông, bi klă dŭm boh tŭ dưi mâo hlăm klei mlih mrô ala čar leh anăn mlih mrô hlăm alŭ wăl bruă duh mkra êpul, êpul bi mguôp, mbĭt anăn ktrâo klă dŭm klei dôk mâo, klei dleh dlan, klei lông dlăng leh anăn dŭm boh klei ară anei, čiăng mâo hdră êlan djŏ guôp mtrŭt mđĭ bruă mlih mrô hlăm wưng kơ anăp, mkŏ mjing boh kdrŭt kơ bruă duh mkra êpul, êpul bi mguôp mđĭ kyar hmar leh anăn kjăp nao mbĭt hŏng bruă hluê ngă hdră mtrŭn mrô 20 mơ̆ng gưl dlông.

Pô mblang: Y-Ƀel Êban