VOV4.Êđê - Tlam mbruê 12/10, mkŏ mjing leh klei kƀĭn trông gưl dlông khua gĭt gai mniê ASEAN gưl tal 2 hŏng klei nao hgŭm mơ̆ng phung khua gĭt gai dŭm ala čar ASEAN leh anăn phung bi ala khua gĭt gai mniê, phung mnia mblei mniê mơ̆ng dŭm ala čar ASEAN leh anăn ƀĭng hgŭm. Anei jing klei kƀĭn êdei kơ klei kƀĭn trông gưl dlông khua gĭt gai mniê ASEAN gưl tal êlâo dưi mkŏ mjing hlăk thŭn 2020 mơ̆ng Việt Nam, Khua gĭt gai ASEAN wưng anăn mkŏ mjing. Klei kƀĭn kñăm mkŏ mjing klei bi trông gưl dlông kơ klei mtăp mđơr êklei mniê leh anăn mđĭ hĭn klei dưi kơ phung mniê, hluê anăn mdưm phung mniê hlăm mta kñăm mơ̆ng dŭm klei gĭr bi mguôp leh anăn mkŏ mjing êpul êya ASEAN.

Khua knŭk kna Hunsen, Khua knŭk kna Phạm Minh Chính mbĭt hŏng lu phung khua gĭt gai yap yuôm bhăn klei tŭ jing mơ̆ng klei kčĕ, dlăng anăn jing tur knơ̆ng bi êdah klei mpŭ hŏng bruă klam mơ̆ng phung mniê hlăm klei đĭ kyar bruă duh mkra ala ƀuôn hlăm alŭ wăl leh anăn klei ƀuăn rơ̆ng mơ̆ng ASEAN hlăm bruă mtrŭt mđĭ klei mtăp mđơr êkei mniê. Blŭ hlăm klei kƀĭn, Khua knŭk kna Phạm Minh Chính mñă klă bruă klam leh anăn klei đru mguôp mơ̆ng dŭm knơ̆ng bruă mniê hlăm klei krŭ wĭt leh anăn mđĭ kyar bruă duh mkra Việt Nam leh anăn alŭ wăl. Khua knŭk kna lŏ mñă ktang klei ƀuăn mơ̆ng Việt Nam hlăm klei bi mguôp hŏng dŭm ala čar ASEAN čiăng mtrŭt mđĭ hĭn klei mtăp mđơr êkei mniê leh anăn mđĭ hĭn klei dưi kơ phung mniê, đru kơ klei hdĭp mgi dih kjăp hĭn, kluôm ênŭm leh anăn čŏng pô mơ̆ng hlăm alŭ wăl wăt kơ tar rŏng lăn.

VOV TâyNguyên/Pô mblang: Y-Ƀel Êban