Blŭ hrăm hlăm klei kƀĭn, Khua knŭk kna Phạm Minh Chính čih yap, bi myuôm leh anăn pah mni dŭm klei gĭr, boh tŭ dưn mơ̆ng dhar bruă Knơ̆ng prăk dưi mâo hlăm thŭn 2023, đru mguôp yuôm bhăn hŏng boh tŭ mbĭt mơ̆ng lăn čar.

Bi kơ dŭm bruă klam klă klơ̆ng, Khua knŭk kna mñă kơ Knơ̆ng prăk knŭk kna bi myuôm hdră êlan ngăn prăk čŏng pô, mbruă, djŏ wưng kčah, tŭ dưn, bi mguôp kjăp hŏng dŭm hdră êlan ngăn prăk pŏk mlar djŏ guôp, mâo mta kñăm leh anăn dŭm hdră êlan prŏng mkăn. Mta kñăm srăng mđing tal êlâo mtrŭt mđĭ klei đĭ kyar bruă duh mkra nao mbĭt hŏng bruă duh mkra prŏng, ksiêm dlăng klei prăk luč ênoh, rơ̆ng kơ dŭm klei bi kna mơ̆ng bruă duh mkra, bi hơĭt anôk mnia mblei leh anăn êđăp ênang hlăm klei ngă bruă mơ̆ng jar dŭm êpul bruă ngăn prăk.