.-  Ƀi wưng nao hlăm klei kƀĭn trông gưl dlông Êpul dŭm ala čar đĭ kyar mrô 1 (G7) leh anăn mă bruă ti Japon, tlam mbruê 19/5, ti Hiroshima, Khua knŭk kna Phạm Minh Chính nao hgŭm hlăm knăm ba mdah êlan phiơr kpă tal êlâo plah wah Việt Nam leh anăn Hiroshima leh anăn jing êlan phiơr tal 8 mkŏ 2 ala čar mơ̆ng knơ̆ng bruă êdeh phiơr Vietjet. Êlan phiơr Hà Nội – Hiroshima kčưm ba yua mơ̆ng hruê 19/7/2023 hŏng 2 gưl phiơr wĭt nao grăp hruê kăm jing knăm 4 leh anăn knăm 7.

Sơnăn, ară anei Vietjek dôk mâo dŭm êlan phiơr kpă mơ̆ng Hà Nội, ƀuôn prŏng Hồ Chí Minh truh kơ Tokyo, Osaka, Nagoya, Fukuoka leh anăn lu gưl phiơr truh kơ Niigata, Shizuoka, Fukushima. Hluê anăn Vietjek mđĭ dŭm gưl phiơr Việt Nam – Japon đĭ 58 gưl wĭt nao hlăm sa hruê kăm. Dŭm dŭm êlan phiơr kpă mrâo mơ̆ng Vietjek, hmăng hmưi klei bi mguôp plah wah Hiroshima leh anăn Việt Nam srăng lŏ đĭ hĭn hlăm dŭm mta bruă, mâo wăt bruă mnia mblei leh anăn hiu čhưn ênguê.