VOV4.Êđê - Blŭ hlăm knăm bi hdơr hruê phung mnia mblei Việt Nam 13/10 leh anăn pah mni phung mnia mblei Việt Nam êdah êdi mkŏ mjing aguah mbruê 12/10, Khua knŭk kna Phạm Minh Chính mâo klei hơêč hmưi jăk siam hĭn kơ êpul êya dŭm knơ̆ng bruă, êpul phung mnia mblei Việt Nam, hơêč hmưi kơ jih jang ƀrư̆ hruê ƀrư̆ đĭ kyar ktang, đru mguôp lu hĭn hlăm bruă mkŏ mjing ala čar Việt Nam kjăp ktang leh anăn mdrŏng sah. Ară anei, Việt Nam mâo leh giăm 900 êbâo knơ̆ng bruă dôk ngă bruă. Êpul êya phung mnia mblei hlăm kluôm ala truh leh dŭm êklăk čô. Alŭ wăl knơ̆ng bruă đru mguôp êbeh 60% GDP, hlăm brô 30% mnuih mă bruă dôk mă bruă. Blŭ hlăm knăm anăn, Khua knŭk kna Phạm Minh Chính mñă klă, knŭk kna srăng lŏ dơ̆ng mkŏ mjing, bi kluôm hdră kiă kriê, hdră êlan, mđĭ hĭn klei blŭ hrăm, nao hrăm mbĭt, mđĭng hmư̆, kah mbha, mgaih msir klei dleh dlan, kpăk êgun, klei hưn mdah mơ̆ng knơ̆ng bruă. Bi kơ êpul êya dŭm knơ̆ng bruă, phung mnia mblei Việt Nam, Khua knŭk kna hmăng hmưi diñu lŏ dơ̆ng mđĭ hĭn klei bi ktưn mkra mjing mnơ̆ng dhơ̆ng, bruă mă pô, đru mđĭ kyar bruă duh mkra ala ƀuôn ti ala čar.

Hlăm knăm pah mni, Khua knŭk kna Phạm Minh Chính mđup brei leh klei pah mni kơ 10 knơ̆ng bruă Việt Nam kdlưn hĭn thŭn 2022, Êpul mkŏ mjing ăt mđup brei klei pah mni kơ 6 čô mmia mblei mâo bruă ngă kdlưn hĭn hlăm bruă gang mkhư̆ klei ruă tưp Covid-19 leh anăn mđup brei klei pah mni kơ 60 čô mnia mblei Việt Nam êdah êdi thŭn 2022.

VOV TâyNguyên/Pô mblang: Y-Ƀel Êban