Tlam mmăt mbruê 1/2, ti Hà Nội, Khua knŭk kna Phạm Minh Chính nao hlăm knăm mđup brei klei pah mni bruă klei mrâo Kmŭt mniă êa mah gưl tal 8 thŭn 2023. Mâo 72 klei čih kdlưn hĭn mâo êpul mkŏ mjing ruah mă mđup brei klei pah mni bi ala kơ 2.216 klei čih bi lông, bi kƀĭn klei gĭr ktưn, klei thâo mĭn, klei jhŏng leh anăn bi êdah klei ksiêm duah, mă bruă hŏng klei mbruă hŏng klei mĭn mbruă, ai tiê mă bruă leh anăn bruă klam yang ƀuôn, hŏng klei khăp kơ lăn čar, ala čar mơ̆ng phung čih klei mrâo.

Blŭ hlăm knăm anăn, Khua knŭk kna Phạm Minh Chính hơêč hmưi klei tŭ jing mơ̆ng klei bi lông Kmŭt mnia êa mah gưl tal 8 thŭn 2023 leh anăn hơêč hmưi kơ grăp čô, êpul êya nao hgŭm leh anăn mâo mă klei bi lông thŭn anei. Hŏng hdră “Mă dŏ siam, lui dŏ jhat, mă klei jăk ksưh mdŭn klei jhat”, Khua knŭk kna mñă kơ dŭm gưl bruă Đảng, êpul bruă Đảng kñăm gĭt gai, ktrâo lač, mkŏ mjing klei găl kơ dŭm anôk bruă klei mrâo, phung čih klei mrâo kñăm hâo hưn, čih hưn kơ dŭm boh tŭ klei hlak mblang, klei mĭn mlih mrâo mơ̆ng Đảng leh anăn gĭr ktưn mkŏ mjing Đảng ênuah ênô, kjăp ktang. Mđĭ hĭn dŭm klei čih kơ phung mâo klei bi hmô, gru hmô jăk, phung êdah êdi.