VOV4.Êđê - Tlam mbruê, Khua knŭk kna Phạm Minh Chính nao čuh leh brui mgưi ti sang kkuh kơ Awa Hồ leh anăn čuh brui mngưi bi hdơr kơ phung hjŏng ktang djiê êngiă ti să Hiệp Hưng, kdriêk Phục Hiệp, čar Hậu Giang. Lŏ dơ̆ng kơnăn, Khua knŭk kna mbĭt hŏng êpul ngă bruă nao ksiêm dlăng wăl kriê pioh krĭng lăn êa êngăp Lung Ngọc Hoàng ti kdriêk Phụng Hiệp.

Anôk kriê pioh anei jing anôk lu jơr, yuôm bhăn hĭn êdi ti ala čar ară anei, dưi pia jing “ksŏ mtah” mơ̆ng krĭng dap mnai krông Cửu Long. Leh hmư̆ klei hưn mdah leh anăn ksiêm dlăng, Khua knŭk kna mtă kơ čar duah pô duh bi liê mâo ai dưi, klei thâo čiăng bi lar, mă yua dŭm mta čŏng mâo mơ̆ng wăl kriê pioh kñăm mđĭ kyar bruă hiu chưn ênguê hlăm dŭm alŭ wăl hluê si klei bhiăn ala čar. Bruă sang čư êa dŭm gưl mtrŭt mjhar mnuih ƀuôn sang nao hgŭm ngă jăk bruă kriê pioh wăl hdĭp mda, răng dŭm dŭm mta hlô mnơ̆ng, ana kyâo mtâo yuôm bhăn.

Y-Ƀel pô mblang