VOV4.Êđê- Ƀri bi hdơr 60 thŭn hrue knhuah gru kahan ksiêm yang ƀuôn, lehanăn drông mă Mêđai Hồ Chí Minh mkŏ mjing leh mlan mbrue (17/7) ti Hà Nội, Khua knŭk kna Phạm Minh Chính mâo leh kơ klei hơêč hmưi jăk siam hĭn truh hŏng phung khua kahan, lehanăn jih jang phung knuă druh, kahan ksiêm, jing phung mâo mjing leh sa klei dưi mrâo hlăm ênuk ară anei.

Blŭ hrăm ti knăm anei, Khua knŭk kna mñă: Hlăm dăl thŭn mlan bi blah, rŭ mdơ̆ng, lehanăn đĭ kyar, kahan ksiêm yang ƀuôn Việt Nam mâo bi êdah klei kjăp, klei knhăk lehanăn klei sĭt suôr kjăp mră hŏng Đảng, Knŭk kna, hŏng lăn čar lehanăn phung ƀuôn sang, hŏng hdră êlan yang ƀuôn ngă phŭn êngiê. Hlăm wưng kơ anăp, mơ̆ng boh klei dlông rŏng lăn, lehanăn alŭ wăl mâo leh dŭm klei găl, klei myun, klei lông dlăng, lehanăn klei dleh dlan mbĭt. Hŏng bruă klam knơ̆ng, čŏng ngă bruă kjăp, Khua knŭk kna mtă êpul kahan ksiêm păn kjăp nanao boh klei, jih ai tiê mlih mrâo klei mĭn, klei ngă bruă, mjing klei thâo bi mguôp prŏng, mghaih msir jih jang klei awăt êdu, bi leh jăk bruă čuăn, mghaih msir bi jih ya mta bruă knuă knŭk kna kčĕ./.

Pô mblang: Y-Khem Niê