VOV4.Êđê -  Aguah mbrue (20/1), Khua knŭk kna Phạm Minh Chính nao lehanăn kiă kriê klei bi kƀĭn hlue ngă bruă mdrao mgŭn thŭn 2022 mâo Phŭn bruă mdrao mgŭn mkŏ mjing, hlue hdră online bi mguôp hŏng klă anăp mâo mkŏ hŏng 700 anôk hlăm 62 boh čar, ƀuôn prŏng hlăm kluôm ala.

Blŭ hrăm ti anôk bi kƀĭn, Khua knŭk kna Phạm Minh Chính mñă, bruă mdrao mgŭn mghaih msir mtam ya mta klei adôk ka djŏ, klei awăt, ruh mtlaih jih djăp mta klei gun kpăk kơ bruă mdrơ̆ng hŏng klei ruă tưp, msĕ si brei klei dưi ba yua êa drao, vaccine, mkŏ mjing êpul hiu mdrao mgŭn, sang êa drao jing jai boh nik brei klei dưi blei mprăp, lehanăn mghaih msir ktang ya klei ngă soh, gang mkhư̆ mtam djăp mta bruă ngă amâo mâo djŏ, klei ƀơ̆ng ngăn, phung duah mă klei tŭ dưn kơ pô, amâo mâo lui phung ngă soh bi čhŏ êpul êya bruă. Mkŏ mjing êpul knuă druh nai aê mdrao klă sĭt mâo ai tiê jhŏng, kjăp hlăm bruă kđi čar, thâo mbruă, ngă bruă hŏng klei tŭ jing. Mđĭ hĭn bruă mjuăt bi hriăm phung nai aê mdrao hŏng klei đua klam prŏng kơ bruă knuă./.

Y – Khem pô mblang