Klei bi kƀĭn trông dưi mkŏ mjing ti Sang hră gưl prŏng RMIT, ƀuôn prŏng Melbourne, bang Victoria, mâo Phŭn bruă Hdră kčah lehanăn Duh bi liê hŏng Anôk bruă bi ala Việt Nam ti Australia bi hgŭm hŏng Anôk bruă Mnia mblei lehanăn Duh bi liê Australia, Anôk bruă bi ala Australia ti Việt Nam mkŏ mjing hŏng klei hgŭm mơ̆ng lu anôk bruă duh mkra dua ala čar. Tinei, phung bi ala dưi hưn mthâo kơ klei găl mâo, wăl anôk duh bi liê, mnia mblei mơ̆ng Việt Nam lehanăn Australia; hmư̆ klei hưn mthâo kơ hdră kčah duh bi liê mơ̆ng anôk bruă duh mkra dua ala čar. Tĭng dlăng klei găl đĭ kyar mơ̆ng wăl anôk ngăn prăk Việt Nam; Tĭng dlăng hdră bi hgŭm duh bi liê hlăm bruă lŏ hma ba yua kdrăp mrâo mơ̆ng anôk bruă duh mkra Việt Nam ti Australia.

Boh nik, Klei bi kƀĭn trông jing wưng čiăng kơ anôk bruă duh mkra ba mdah klei êmuh lehanăn mâo phung khua phŭn, dhar bruă djŏ tĭng mblang dŭm bruă djŏ tuôm, msĕ si: Hdră êlan mđĭ kyar bruă duh mkra mơ̆ng grăp ala čar, dŭm bruă mđing tal êlâo, dŭm klei bhiăn, hdră mtrŭn, anôk bruă nah gŭ, mnuih mă bruă… Mbĭt anăn, anôk bruă duh mkra dua tĭng ăt bi trông kơ hdră duh bi liê, mnia mblei.

Blŭ ti knăm anei, Khua knŭk kna mtă hlăm hdră bi hgŭm, brei dua tĭng mtrŭt mđĭ dŭm boh kdrŭt đĭ kyar msĕ si klei duh bi liê, ba čhĭ mnơ̆ng kơ ala tač êngao, bruă blei yua, bi mlih mrô, bi mlih mtah. Mbĭt anăn ăt čang hmng dua tĭng mtrŭt mđĭ hdră bi mjĕ mjuk mnuih ƀuôn sang, bruă hiu čhưn ênguê, dhar kreh lehanăn mtô bi hriăm hluê hdră mđĭ lar knhuah jăk siam mơ̆ng dua djuê ana./.