Nao ti knăm anei mâo Khua knŭk kna, Khua Êpul dŭm ala čar Cam-pu-chia, Lào, Mi-an-ma, Thái Lan, China lehanăn Việt Nam. Khua knŭk kna Phạm Minh Chính mâo leh klei blŭ hrăm yuôm bhăn ti Anôk bi kƀĭn. Klei bi kƀĭn mđing tĭng dlăng boh tŭ hdră bi hgŭm Mê Công – Lan Thương hlăm 3 thŭn êgao lehanăn bi trông kơ hdră mă bruă wưng ti anăp. Phung khua mñă leh dŭm klei đru mguôp yuôm bhăn mơ̆ng MLC hŏng klei êđăp ênang, hgŭm bruă lehanăn đĭ kyar h’ĭt kjăp ti krĭng Mê Công lehanăn krĭng wăl, mbĭt anăn mñă srăng bi hgŭm kjăp, hrăm mbĭt mkŏ mkra Êpul êya êđăp ênang, đĭ kyar mơ̆ng dŭm ala čar krĭng Mê Công – Lan Thương.

Kơ hdră hgŭm bruă hlăm wưng ti anăp, phung khua kiă kriê mñă leh klei mđing mđĭ kyar, dlăng mnuih ƀuôn sang jing phŭn, mjing klei bi knar plah wah anak mnuih lehanăn lăn adiê. Klei bi kƀĭn tŭ ư mtrŭt mđĭ hdră bi hgŭm hrăm mbĭt mkŏ mkra Ktuê roh mđĭ kyar bruă duh mkra Mê Công – Lan Thương; ksiêm dlăng bruă čih mkra klei bhiăn, hdră mtrŭn bi hgŭm, pŏk hdră mtrŭt mđĭ Klei mĭn mrâo Mê Công – Lan Thương. Blŭ ti knăm anei, Khua knŭk kna Phạm Minh Chính mñă klă, Knŭk kna Việt Nam bi mni lehanăn srăng bi hgŭm hŏng China lehanăn dŭm ala čar Mê Công mtrŭt mđĭ hdră hgŭm bruă Mê Công – Lan Thương ƀrư̆ hruê đĭ kyar tŭ dưn lehanăn h’ĭt kjăp./.