VOV4.Êđê- Khua knŭk kna Phạm Minh Chính hruê 6/3 nao leh ti Klei bi kƀĭn mtrŭt mđĭ bruă lŏ hma krĭng Dap mnai êa krông Cửu Long mdrơ̆ng hŏng klei bi mlih yan adiê ti čar Kiên Giang. Hdră anei mâo Phŭn bruă Lŏ hma mđĭ kyar krĭng ƀuôn sang lehanăn 13 čar, ƀuôn prŏng krĭng Dap mnai êa krông Cửu Long bi hgŭm mkŏ mjing. Klei bi kƀĭn mtrŭt mđĭ bruă lŏ hma krĭng Dap mnai êa krông Cửu Long jing hdră bruă yuôm bhăn kñăm mtrŭt mđĭ bruă hluê ngă Hdră mtrŭn klei bi kƀĭn tal XIII mơ̆ng Đảng lehanăn dŭm Hdră mtrŭn mơ̆ng Đảng, Knŭk kna hlăm bruă lŏ hma. Hluê si mta kñăm mđĭ kyar krĭng Dap mnai êa krông Cửu Long truh thŭn 2025 mâo hnơ̆ng đĭ kyar GDP bruă lŏ hma êbeh 3%/thŭn. Hnư hrui wĭt kah knar grăp čô krĭng ƀuôn sang đĭ ƀiă êdi 2 blư̆ mkă hŏng thŭn 2018. Blŭ hrăm ti knăm anei, Khua knŭk kna Phạm Minh Chính bi mklă leh bruă klam, k’hưm krĭng Dap mnai êa krông Cửu Long jing yuôm bhăn wăt hlăm bruă duh mkra, kđi čar, ala ƀuôn, bruă lĭng kahan, bi mnia mblei hŏng dŭm ala čar ASEAN lehanăn krĭng krông Mekông. Khua knŭk kna mtă, brei mđĭ lar klei găl mâo hlăm bruă lŏ hma, bi mklă bruă lŏ hma jing phŭn, jing tur knơ̆ng mbĭt anăn pral mâo hdră mdrơ̆ng hŏng klei bi mlih yan adiê, bi mguôp kjăp hŏng bruă tuh tia mkra mjing lehanăn dŭm bruă nah tluôn. Bruă tuh tia mkra mjing lehanăn dŭm bruă nah tluôn brei jing boh kdrŭt mđĭ kyar bruă lŏ hma čiăng ba wĭt boh tŭ dưn./.

Pô mblang: H’Nêč Êñuôl