Ară anei, Việt Nam mâo giăm 910 êbâo anôk bruă duh mkra dôk ngă bruă, đĭ êbeh 3 blư̆ mkă hŏng thŭn 2011, hlăm brô 14,4 êbâo Êpul hgŭm bruă lehanăn êbeh 5 êklăk gŏ êsei ngă bruă duh mkra mnia mblei, krĭng bruă duh mkra đru mguôp êbeh 60% GDP, hlăm brô 30% ênoh mnuih dôk ngă bruă. Dŭm anôk bruă duh mkra, phung mă bruă hlăm djăp mta bruă, amâo djŏ knŏng hlăm ala čar ƀiădah lu anôk bruă duh mkra mâo leh klei hing jăk, mñă klă k’hưm kpưn đĭ hlăm krĭng lehanăn tar rŏng lăn.

Blŭ ti knăm anei, bi ala Knŭk kna, Khua knŭk kna bi mni, čih pioh lehanăn bi myuôm klei đru mguôp mơ̆ng phung mă bruă duh mkra mda asei Việt Nam hlăm hdră mkŏ mkra lehanăn mđĭ kyar ala čar. Mbĭt anăn ăt bi mni Êpul phung mă bruă duh mkra mda asei Việt Nam mâo leh klei hgŭm mguôp kjăp, kiă kriê Êpul mă bruă duh mkra mda asei dŭm gưl hlăm 30 thŭn êgao. Khua knŭk kna mñă, Knŭk kna mđing hmư̆ lehanăn mâo hdră đru kơ čiăng kơ êpul mă bruă duh mkra hgao jih klei dleh dlan, kpưn đĭ kbưi hĭn lehanăn lŏ hrăm mbĭt hŏng Êpul mă bruă duh mkra mda asei Việt Nam lŏ đĭ kyar kjăp ktang hĭn./.