VOV4.Êđê - Mmăt mbruê 27/3, Khua knŭk kna Phạm Minh Chính nao leh ti Knăm bi hdơr 30 thŭn hruê mkŏ mjing čar Sóc Trăng (mlan 4/1992 - 4/2022) lehanăn drông Medai Hồ Chí Minh, hưn mthâo ƀuôn prŏng Sóc Trăng jing ƀuôn prŏng mta II mơ̆ng čar Sóc Trăng.

Blŭ ti knăm anei, Khua knŭk kna Phạm Minh Chính mñă klă, leh 30 thŭn mkŏ mkra lehanăn mđĭ kyar, Sóc Trăng brei bi mklă dŭm klei găl mâo êdah êdi, klei găl bi ktưn čiăng mjing boh kdrŭt đĭ kyar pral, h’ĭt kjăp hŏng ai tiê jưh knang hlăm klei dôk mâo jing klei bi mklă, mta phŭn tal êlâo, sui thŭn lehanăn ai dưi, klei đru mơ̆ng nah êngao ăt jing yuôm bhăn. Khua knŭk kna mtă kơ Sóc Trăng brei lŏ dơ̆ng kriê kjăp lehanăn ksŭl mbŭ klei hgŭm mguôp, bi sa ai hlăm anôk bruă Đảng, bruă sang čư̆ êa, mđĭ ai ktang bi hgŭm mguôp plah wah dŭm djuê ana. Mđing pŏk ngă tŭ dưn dŭm Hdră mtrŭn mơ̆ng Anôk bruă kƀĭn ala, Knŭk kna kơ hdră gang mkhư̆ klei ruă Covid 19 lehanăn hdră lŏ krŭ wĭt, mđĭ kyar bruă duh mkra – ala ƀuôn, pral bi leh bruă tlŏ vaccine aruăt tal 3 kơ mnuih mơ̆ng 18 thŭn kơ dlông, kơ hđeh mơ̆ng 5 truh kơ gŭ 12 thŭn hlăm 3 mlan gưl 2 thŭn 2022./.

H’Nêč pô mblang