VOV4.Êđê - Aguah mbrue (20/6), ti alŭ wăl knông lăn plah wah kdriêk Lộc ninh, čar Bình Phước lehanăn kdriêk Memot, čar Tbong Khmum, ala čar Campuchia; Khua knŭk kna Hunssen kiă kriê leh knăm drông khua knŭk kna Phạm Minh Chính lehanăn êpul khua êmua gưl dlông Việt Nam nao ti anôk bi hdơr tĭng kơ lăn Campuchia.

Blŭ hrăm ti anôk bi hdơr, Khua knŭk kna Campuchia lŏ sa blư̆ dơ̆ng lač bruă Việt Nam ngă jing djŏ, phung kahan ba anăp Việt Nam mbĭt hŏng Campuchia sua mă klei êngiê, dŏng đru phung ƀuôn sang Campuchia mơ̆ng kngan phung măk ƀai Polpot, lŏ kơrŭ wĭt rŭ mdơ̆ng lăn čar Campuchia. Dua čô khua knŭk kna bi êdah klei mơak kyua klei thâo bi mguôp, hgŭm mbĭt mơ̆ng đưm jăk siam plah wah Việt Nam lehanăn Campuchia, kñăm lŏ bi kjăp, ksul mbŭ mđĭ kyar lu hĭn hlăm djăp mta bruă, ba wĭt klei tŭ dưn sĭt kơ phung ƀuôn sang dua ala čar, đru leh yuôm bhăn kơ klei êđăp ênang, hơĭt kjăp, lehanăn mđĭ kyar hlăm alŭ wăl lehanăn tar rŏng lăn. Dua khua knŭk kna yap yuôm klei bi mguôp kjăp dua ala čar riêng gah năng lŏ krơ̆ng kjăp nanao klei anei./.

Y-Khem pô mblang