VOV4.Êđê - Aguah hruê 21/4, Knơ̆ng bruă Jia Việt Nam mkŏ mjing leh Knăm hưn mthâo kdrăp tĭng tla điện tử hlăm kluôm ala. Nao lehanăn blŭ hrăm ti knăm anei, Khua knŭk kna Phạm Minh Chính mtă kơ Anôk bruă Jia brei mđĭ hĭn bruă ba yua kdrăp mrâo hlăm hdră kriê dlăng, rơ̆ng bruă tĭng tla jia điện tử jăk găl, gĭr truh ti thŭn 2022, jih klei ngă hră m’ar djŏ tuôm kơ bruă jia dưi hluê ngă hŏng hdră điện tử mguôp hŏng Mbah hâo hưn bruă knŭk kna ala čar.

Khua knŭk kna Phạm Minh Chính brei thâo, hdră mlih mrô dôk mâo pral hlăm kluôm ala lehanăn tar rŏng lăn. Đảng, Knŭk kna drei dlăng anei jing sa bruă klam phŭn. Khua knŭk kna mtă hlăm wưng ti anăp, anôk bruă Jia bi mklă klei mĭn, mta kñăm čih mkra hdră mtrŭn bi knar, mđrăm mbĭt, kpă mngač, tŭ dưn lehanăn mâo klei h’ĭt kjăp./.

H’Nêč pô mblang