VOV4.Êđê -  Ƀri bi hdơr 92 thŭn Hruê mkŏ mjing Đảng Cộng sản Việt Nam, m’ak Đảng, m’ak Yan Mnga, m’ak lăn čar lehanăn kkuh drông thŭn mrâo Nhâm Dần 2022, mmăt 21/1, Anôk bruă mkŏ mjing gưl dlông mkŏ mjing leh Knăm hưn mthâo lehanăn jao Klei pah mni bruă klei mrâo kluôm ala kơ hdră mkŏ mkra Đảng mâo anăn Búa liềm vàng tal 6. Khua knŭk kna Phạm Minh Chính nao lehanăn jao klei pah mni ti knăm anei.

Blŭ hrăm ti knăm anei, Khua hlăm Anôk kiă kriê bruă Đảng gưl dlông Võ Văn Thưởng čih yap lehanăn bi mni klei đru mguôp prŏng mơ̆ng bruă klei mrâo kluôm ala hŏng hdră mkŏ mkra, ƀư̆ mkra Đảng hlăm wưng êgao, bi mni klei gĭr mơ̆ng Anôk bruă gĭt gai. Anôk bruă mkŏ mjing lehanăn h’êč hmưi kơ jih jang phung mă bruă klei mrâo dưi mâo klei pah mni. Khua hlăm Anôk kiă kriê bruă Đảng lač klă, dŭm hră klei mrâo lač kơ bruă mkŏ mkra Đảng đru leh kơ mnuih ƀuôn sang hlăm lehanăn êngao ala čar, ƀĭng găp ala tač êngao thâo săng klă hĭn kơ Đảng drei lehanăn hdră mkŏ mkra, ƀư̆ mkra Đảng kơ dŭm boh tŭ dưi mâo ti gŭ klei gĭt gai mơ̆ng Đảng./.

H’Nêč pô mblang