VOV4.Êđê- Aguah mbrue (5/9), hlăm klei mtlŭk mrlak mơak mñai hrue pŏk thŭn hriăm mrâo, Khua knŭk kna Phạm Minh Chính mơĭt leh kơ phung nai mtô, phung knuă druh, mnuih ngă bruă hlăm sang hră mơar, lehanăn jih jang phung hđeh hriăm hră kluôm ala, lehanăn sang hră gưl sa êngao knŭk kna Đoàn Thị Điểm klei kkuh čhưn, čua êmuh jih ai tiê, lehanăn klei hơêč hmưi thŭn hriăm mrâo jăk siam hĭn. Khua knŭk kna čang hmăng hlăm dŭm hrue nao sang hră mơar phung hđeh srăng mâo hriăm dŭm klei hriăm thâo hdơr knga, klei thâo khăp kơ lăn čar, kơ ƀuôn sang.

Thâo hdơr knga kơ amĭ ama aê aduôn, kơ nai mtô hrue mlam mjuăt mgô mtô bi hriăm leh pô. Phung hđeh dưi mjuăt bi hriăm dŭm ai tiê klei mĭn prŏng, tui hriăm mơ̆ng dŭm klei thâo bi hmô mơ̆ng phung nao êlâo mơ̆ng hƀuê ênuk djuê ana. Hŏng phung knuă druh ngă bruă sang hră mơar, mđing mghaih msir jih jang klei awăt êdu, lehanăn klei ka djŏ. Bruă čuăn tinăp jing mghaih msir 3 mta klei dôk kƀah, anăn jing nai mtô – kƀah adŭ hriăm – kƀah hdruôm hră hriăm. Ngă klei tlŏ vaccine djăp ênŭm kơ phung hđeh, hơĭt ai tiê nao sang hră mơar, amĭ ama hơĭt bruă knuă mă, lehanăn phung nai hơĭt ai tiê mtô mơh./.

Pô mblang: Y-Khem Niê