VOV4.Êđê- Aguah mbruê 30/8, ti sang kƀĭn Thống Nhất, ƀuôn prŏng Hồ Chí Minh, Khua knŭk kna Phạm Minh Chính mâo leh klei bi tuôm pah mni dŭm êpul êya klei đăo mâo klei bi mguôp hlăm bruă mkŏ mjing leh anăn răng mgang ala čar. Việt Nam jing ala čar mâo lu mta klei đăo knang, mâo 43 êpul êya hlăm 16 mta klei đăo knang mâo knŭk kna tŭ yap leh anăn brei klei dưi ngă bruă, êbeh 26 êklăk 500 êbâo čô pô đăo, hlăm brô 27% ênoh mnuih ƀuôn sang kluôm ala. Hlăm klei kƀĭn, lu phung bi ala jing phung djă bruă klei đăo mâo leh klei bi êdah hŏng ai tiê, bruă klam kñăm hluê ngă klă klơ̆ng, mâo boh tŭ dưn hĭn dŭm hdră êlan, hdră mtrŭn, klei bhiăn ala čar kơ klei đăo knang mơ̆ng Đảng, knŭk kna hlăm hruê mmông kơ anăp.

Blŭ hlăm klei kƀĭn, Khua knŭk kna Phạm Minh Chính mnă klă, Đảng, knŭk kna mâo nanao klei uêñ mĭn hluê ngă hdră êlan klei mpŭ leh anăn rơ̆ng klei dưi êngiê hlăm klei đăo knang mnuih ƀuôn sang. Hlăm hruê mmông kơ anăp, Khua knŭk kna mtă: khua gĭt gai dŭm êpul ya klei đăo lŏ dơ̆ng mtrŭt mjhar phung djă bruă, phung mă bruă, phung đăo hluê ngă jăk hdră êlan, hdră mtrŭn mơ̆ng Đảng, klei bhiăn ala čar. Rơ̆ng êlan klei hưn klei đăo bi mguôp, hrăm mbĭt hŏng djuê ana. Bi kjăp klei bi mguôp djuê ana, bi mguôp dŭm mta klei đăo.

Pô mblang: Y-Ƀel Êban