Hlăm mmông drông, Khua knŭk kna Phạm Minh Chính bi mni kơ gưl nao čhưn tal dua mơ̆ng Khua phŭn bruă hŏng tač êngao Brazil ti Việt Nam leh anăn kah mbha dŭm klei jăk siam kơ lăn čar leh anăn anak mnuih Brazil hlăm gưl nao čhưn hlăm mlan 9/2023 mrâo êgao; bi mni kơ hdră êlan mơ̆ng Knŭk kna Khua mil čhil Lula da Silva čiăng mđĭ kơhưm bruă duh mkra, kđi čar, bruă klam jăk mơ̆ng Brazil ti krĭng wăl leh anăn dlông rŏng lăn leh anăn đăo knang gưl nao čhưn mơ̆ng Khua phŭn bruă hŏng tač êngao Mauro Vieira srăng đru mđĭ hĭn klei bi hgŭm kluôm Việt Nam – Brazil; jing knhuang êbat klă klơ̆ng čiăng pŏk ngă klei kuôl kă mơ̆ng khua gĭt gai gưl dlông dua ala čar hlăm wưng êgao, boh nik dŭm bruă dua ala čar mâo klei găl leh anăn klei čiăng, kyua klei tŭ dưn mơ̆ng mnuih ƀuôn sang dua ala čar, kyua klei êđăp ênang, bi hgŭm leh anăn mđĭ kyar ti dua krĭng wăl leh anăn dlông rŏng lăn.

 Khua phŭn bruă Mauro Vieira ăt hưn leh mơh hŏng Khua knŭk kna kơ dŭm boh phŭn bi trông hŏng Khua phŭn bruă hŏng tač êngao Bùi Thanh Sơn; brei thâo dua tĭng kčĕ hdră msir klă klơ̆ng leh anăn bi tŭ ư hdră bi hgŭm dua nah Việt Nam – Brazil hlăm wưng kơ anăp, boh nik hlăm dŭm bruă dua tĭng mâo klei găl leh anăn mđing dlăng msĕ si bruă lŏ hma, kreh knhâo kdrăp mrâo, êa pui êwa čuh…