VOV4.Êđê- Aguah mbrue (11/5), Khua knŭk kna Phạm Minh Chính djă akŏ êpul khua prŏng knŭk kna Việt Nam truh leh kơ ƀuôn prŏng phŭn Washington ala čar Mi kčưm gưl nao ti anôk bi kƀĭn gưl dlông ASEAN – Mi. Hlăm klei bi kƀĭn anei, phung khua kiă kriê ASEAN lehanăn khua mil čhil Mi lŏ ksiêm wĭt jih jang bruă leh mâo ngă dua nah hlăm 45 thŭn êgao, lehanăn lŏ bi kjăp hdră êlan hlăm wưng kơ anăp klei bi mguôp dua nah, lehanăn pioh lu mmông bi trông kơ bruă hlăm alŭ wăl lehanăn tar rŏng lăn dôk bi mđing.

Hlăm klei anei mơh, Khua knŭk kna Phạm Minh Chính srăng mâo klei bi tuôm phung khua kiă kriê dŭm phŭn dhar bruă, êpul bruă dlông rŏng lăn, phung duh mkra, phung truăn kơ bruă, phung ksiêm lu mơ̆ng Mi, lehanăn nao čuă dŭm anôk duh mkra, anôk bruă dhar kreh, sang hră mơar Mi, nao ti anôk bi tuôm hŏng phung duh mkra mnia mblei, bruă hiu čhưn ênguê, lehanăn duh bi liê. Khua knŭk kna mprăp lu mmông bi tuôm hŏng mnuih Việt Nam hdĭp kơ Mi./.

Pô mblang: Y-Khem Niê