VOV4.Êđê- Tlam mbruê 3/10, Khua knŭk kna Phạm Minh Chính tŭ drông leh aduôn Dabla-Norris, khua êpul ksiêm dlăng mơ̆ng keh prăk tar rŏng lăn IMF kơ bruă duh mkra hnơ̆ng prŏng leh anăn ngăn prăk mơ̆ng dŭm ala čar, dôk mâo klei hriê čuă leh anăn mă bruă ti Việt Nam. Khua knŭk kna lač jăk kơ dŭm klei đru yuôm bhăn mơ̆ng IMF kơ Việt Nam mơ̆ng dŭm thŭn kčưm đĭ kyar truh kơ ară anei, giăm anei jing đru kčĕ bruă ngăn prăk, mtô mjuăt mnuih mă bruă, boh nik jing dŭm klei hlăk mblang, bi klă leh anăn mtrŭt mjhar hlăm dŭm mta bruă kriê dlăng bruă duh mkra hlăm wưng klei ruă tưp Covid-19. Bi trông kơ bruă duh mkra Việt Nam, Khua knŭk kna Phạm Minh Chính brei thâo, mbĭt hŏng bruă ksiêm dlăng klei ruă tưp Covid-19, bruă duh mkra Việt Nam dưi rơ̆ng mâo klei hơĭt leh anăn krŭ wĭt ktang. Bruă gĭt gai mơ̆ng knŭk kna dưi hluê ngă hŏng klei čŏng pô, kjăp, mbruă leh anăn djŏ hruê mmông. Khua knŭk kna mñă kơ IMF lŏ dơ̆ng đru kơ Việt Nam jing ala čar dôk đĭ kyar, mđĭ hĭn bruă đru kčĕ klei ngă bruă kơ knŭk kna leh anăn dŭm anôk bruă gĭt gai bruă duh mkra, bi mdrơ̆ng hŏng klei truh amâo năng mâo ară anei, lŏ dơ̆ng mkăp brei hdră mtô mjuăt bi hriăm, đru kơ bruă ksiêm dlăng bruă duh mkra, đru kơ Việt Nam mđĭ kyar bruă duh mkra mtah, bi djŏ guôp hŏng klei mlih yan adiê leh anăn mlih mrô…

Pô mblang: Y-Ƀel Êban