VOV4.Êđê - Aguah mbruê, ti Hà Nội, Khua knŭk kna Phạm Minh Chính tŭ drông leh khua bruă kƀĭn ala Singapore Tan Chuan-Jin dôk hriê čuă ala čar Việt Nam. Hlăm mmông tŭ drông, Khua knŭk kna Phạm Minh Chính mñă kơ 2 tĭng mtrŭt mđĭ ktang hĭn dŭm klei nao čuă, klei bi tuôm gưl dlông leh anăn dŭm gưl, hluê ngă mâo boh tŭ dưn dŭm hdră êlan, klei kuôl kă bi mguôp 2 tĭng, boh nik jing klei kƀĭn trông Khua phŭn bruă kơ klei mkŏ bruă duh mkra Việt Nam – Singapore.

Khua knŭk kna hmăng hmưi bruă kƀĭn ala 2 ala čar lŏ dơ̆ng sa ai, mkŏ mjing klei găl kơ klei bi mguôp krŭ wĭt leh anăn mđĭ kyar bruă duh mkra wưng êdei klei ruă tưp, hlăm anăn kñăm kơ dŭm mta bruă Singapore mâo klei găl leh anăn Việt Nam mâo klei čiăng msĕ si: mlih mrâo klei thâo mbruă, pui kmlă mtah, bruă duh mkra mrô, bi lu jơr klei mkăp brei tar rŏng lăn. 2 čô khua gĭt gai ăt bi trông kơ boh sĭt hlăm alŭ wăl, tar rŏng lăn leh anăn dŭm boh klei 2 tĭng dôk mđing. Hlăm anăn mñă ktang ASEAN čiăng rơ̆ng kjăp klei mĭn, klei bhiăn ti krĭng ksĭ Ngŏ, mgaih msir klei amâo thâo bi djŏ hŏng hdră êlan êđăp ênang hluê si klei bhiăn tar rŏng lăn mâo wăt klei kuôl kă mơ̆ng Êpul hgŭm lu ala čar kơ klei bhiăn hlăm êa ksĭ 1982 (UNCLOS 1982) leh anăn klei yuôm bhăn mơ̆ng bruă rơ̆ng klei êđăp ênang, klei êngiê bruă duh mdiăng êlan êa ksĭ leh anăn êlan êdeh phiơr ti krĭng ksĭ Ngŏ.

Y-Khem pô mblang