VOV4.Êđê - Tlam mbruê 1/6, Khua knŭk kna Phạm Minh Chính tŭ drông leh Khamphan Phommaphat, khua hlăm phŭn bruă kđi čar, khua bruă ksiêm duah ala čar Lao hriê čuă, mă bruă leh anăn bi trông klei bi mguôp hŏng phung ksiêm duah mơ̆ng knŭk kna Việt Nam. Khua knŭk kna Phạm Minh Chính mñă klă, klei mjĕ giăm Việt Nam – Lào jing klei mjĕ giăm jăk siam, amâo mâo mdei bi mbŏ leh anăn đĭ kyar, dưi bi klă hlăm hră klei mâo, Việt Nam yap yuôm bhăn klei bi mguôp hŏng Lào, ngă jih ai pô čiăng mtrŭt mđĭ klei mjĕ giăm jing ayŏng adei, bi mguôp kjăp, mâo boh tŭ dưn hlăm djăp mta bruă.

Khua knŭk kna yap yuôm bhăn boh tŭ klei blŭ hrăm plah wah 2 êpul ksiêm duah ala čar Lào leh anăn knŭk kna Việt Nam. Mñă klă Khua knŭk kna Việt Nam srăng mtrŭt mjhar leh anăn mkŏ mjing klei găl čiăng 2 tĭng mđĭ hĭn klei bi mguôp hlăm bruă ksiêm duah, mgaih msir klei kčŭt hưn, gang mkhư̆ klei ƀơ̆ng ngăn, mprăp mkŏ mjing djăp klei găl čiăng kơ Êpul ksiêm duah knŭk kna Việt Nam mkŏ mjing dŭm gưl mtô mjuăt klei ngă bruă kơ phung knuă druh hluê si klei mñă mơ̆ng phung ksiêm duah ala čar Lao.

            Y-Ƀel pô mblang