- Tlam mbruê 24/4, ti anôk bruă knŭk kna, Khua knŭk kna Phạm Minh Chính tŭ drông khua gĭt gai Phŭn Bruă lŏ hma dŭm ala čar nao hlăm klei kƀĭn tar rŏng lăn gưl tal 4 kơ klei bi mâo djăp mnơ̆ng ƀơ̆ng huă hŏng klei kjăp (SFS) hŏng akŏ “Mlih klei mkra mjing mnơ̆ng ƀơ̆ng huă doh êbăt, kjăp, djŏ guôp hŏng klei mlih yan adiê leh anăn kluôm hlăm wưng klei rŭng răng mrâo”. Hlăm mmông tŭ drông, Khua knŭk kna mñă kơ dŭm ala čar dôk đĭ kyar mđĭ hĭn boh tŭ dưn klei bi mguôp Việt Nam hŏng dŭm ala čar đĭ kyar Dhŭng boh lăn (piă klă čŭn Dhŭng – Dhŭng), hlăm anăn Việt Nam mprăp kah mbha klei hriăm leh anăn bi mguôp hŏng dŭm ala čar mđĭ kyar bruă lŏ hma, krĭng ƀuôn sang, bi hrŏ ƀun, rơ̆ng bi mâo djăp mnơ̆ng ƀơ̆ng huă hŏng dŭm hdră bi mguôp Dhŭng – Dhŭng, bi mguôp 3 tĭng hŏng klei đru, hrăm mbĭt mơ̆ng phung ƀĭng hgŭm tar rŏng lăn 2 tĭng leh anăn lu tĭng.

Čiăng hluê ngă tŭ dưn hdră mlih mkra mjing mnơ̆ng ƀơ̆ng huă leh anăn mđĭ hĭn klei bi mguôp tar rŏng lăn kơ bruă lŏ hma, krĭng ƀuôn sang hlăm wưng kơ anăp, Khua knŭk kna mñă kơ dŭm tĭng djŏ tuôm mđĭ klei thâo săng kơ kơhưm, bruă klam mơ̆ng bruă lŏ hma, mkŏ mjing hdră kiă kriê, iêo jak ai dưi duh bi liê, ksiêm duah leh anăn dưn yua kdrăp mrâo mrang.