VOV4.Êđê -  Aguah mbruê, Khua knŭk kna Phạm Minh Chính tŭ drông leh Maeda Tadashi, khua kiă kriê Êpul gơ̆ng knơ̆ng bruă ngăn prăk bi mguôp tar rŏng lăn Japon (JBIC). Hlăm mmông tŭ drông, Khua knŭk kna mñă klă Việt Nam yap Japon jing ƀĭng hgŭm bi mguôp hdră êlan tal êlâo leh anăn sui, sa ai hŏng Japon đru mguôp kơ klei êđăp ênang, bi mguôp leh anăn mđĭ kyar hlăm alŭ wăl leh anăn tar rŏng lăn, ba klei mjĕ giăm 2 ala čar hlăm wưng đĭ kyar mrâo, mđing truh kơ 50 thŭn mkŏ mjing klei mjĕ giăm ti thŭn 2023. Khua knŭk kna mñă klă, sa hlăm dŭm bruă ngă tal êlâo mơ̆ng 2 ala čar jing mtrŭt mđĭ bruă duh mkra, ksiêm dlăng klei prăk luč ênoh, bi hơĭt wăl duh bi liê, mnia mblei. Hruê mmông kơ anăp, hŏng ai tiê, klei khăp, klei siă suôr, bi đăo knang, mâo boh tŭ dưn, Khua knŭk kna mñă kơ Japon leh anăn JBIC lŏ dơ̆ng đru kčĕ hŏng knŭk kna leh anăn bruă kƀĭn ala Japon, lŏ dơ̆ng bi trông, bi mguôp kjăp hŏng dŭm anôk Việt Nam čiăng tui duah dŭm hdră êlan bi mguôp mâo boh tŭ dưn, mđĭ kyar hĭn klei bi mguôp hdră êlan kluôm êlam Việt Nam – Japon hlăm wưng mrâo.

Y-Ƀel pô mblang