Hlăm mmông tŭ drông, Khua knŭk kna Phạm Minh Chính mnă klă, Việt Nam dlăng kơ Japon jing ƀĭng hgŭm đăo knang, yuôm bhăn mrô 1 leh anăn sui. Dua tĭng brei thâo klei bi mguôp hdră êlan kluôm êlam Việt Nam – Japon dôk hlăm wưng đĭ kyar jăk siam, ktang leh anăn klă klơ̆ng hlăm lu mta bruă.

Khua knŭk kna Phạm Minh Chính mñă kơ dua tĭng lŏ dơ̆ng bi kjăp klei đăo knang bruă kđi čar hlăm dŭm gưl nao čuă, bi tuôm gưl dlông ăt msĕ hŏng gưl phŭn bruă, dhar bruă, mđĭ hĭn klei mkŏ, bi mguôp plah wah dŭm alŭ wăl, knơ̆ng bruă, mtrŭt mđĭ klei mjĕ mjuk mnuih ƀuôn sang, hlăm anăn Japon ksiêm dlăng bi ênưih bruă mkăp brei visa, mđing truh kơ klei lui visa kơ mnuih ƀuôn sang nao ti Japon čiăng mtrŭt mđĭ klei bi mguôp bruă hiu čhưn ênguê, mjĕ mjuk mnuih ƀuôn sang, mkŏ mjing klei găl kơ êpul êya giăm 500 êbâo čô mnuih Việt Nam dôk hdĭp mda, mă bruă leh anăn hluê hriăm ti Japon.