VOV4.Êđê- Tlam mbruê 05/04, ti anôk bruă knŭk kna, Khua knŭk kna Phạm Minh Chính tŭ drông leh khua phŭn bruă hŏng tač êngao Panama Erika Mouynes ƀri wưng hriê čuă ala čar Việt Nam mơ̆ng hruê 04-06/4. Bi kơ klei jĕ giăm 2 ala čar, Khua knŭk kna hmăng hmưi 2 ala čar srăng lŏ bi mguôp kjăp hĭn, mâo boh tŭ dưn hĭn čiăng kơ Panama jing kdrông đru ba mnơ̆ng dhơ̆ng mơ̆ng Việt Nam truh kơ anôk mnia mblei Mi Latinh, leh anăn lŏ mklăk wĭt hŏng anăn, Việt Nam jing kdrông čiăng kơ mnơ̆ng dhơ̆ng mơ̆ng Panama nao hlăm anôk mnia mblei Ngŏ Dhŭng Asi. Čiăng kơ klei mjĕ giăm 2 ala čar ƀrư̆ hruê ƀrư̆ mâo boh tŭ leh anăn klă klơ̆ng hĭn, Khua knŭk kna Phạm Minh Chính mtă kơ phŭn bruă hŏng tač êngao leh anăn dŭm phŭn, dhar bruă 2 ala čar srăng mđĭ hĭn klei bi trông dŭm êpul, klei bi tuôm êngao dŭm klei kƀĭn trông tar rŏng lăn, bi lar leh anăn bi hĭn boh tŭ klei ksiêm hriăm bruă kđĭ čar gưl k’iăng khua phŭn bruă hŏng tač êngao leh anăn Dhar bruă bi mguôp lu bruă hlăm bruă duh mkra, mnia mblei leh anăn duh bi liê Việt Nam – Panama, mtrŭt mđĭ klei bi mguôp hlăm dŭm mta bruă 2 tĭng mâo klei găl msĕ si mnia mblei, dŭ mdiăng.

Pô mblang: Y-Ƀel Êban