VOV4.Êđê- Tlam mbruê 11/7, ti anôk bruă knŭk kna, Khua knŭk kna Phạm Minh Chính tŭ drông leh khua phŭn bruă hŏng tač êngao, tuh tia leh anăn klei đăo knang Argentina Santiago Andres Cafiero ƀri wưng hriê čuă ala čar Việt Nam mơ̆ng hruê 09 – 11/7. Hlăm mmông tŭ drông, Khua knŭk kna mñă kơ 2 tĭng bi mguôp kjăp čiăng mtrŭt mđĭ dŭm gưl nao čuă leh anăn bi tuôm gưl dlông, mkŏ mjing hdră bi hdơr 50 thŭn mkŏ mjing klei mjĕ giăm plah wah 2 ala čar ti thŭn 2023, rơ̆ng klei bi mguôp, sa ai hdơ̆ng pô hlăm dŭm klei kƀĭn tar rŏng lăn leh anăn lu tĭng, đru mguôp mgaih msir dŭm boh klei hlăm alŭ wăl leh anăn tar rŏng lăn.

Khua phŭn bruă hŏng tač êngao Argentina hmăng hmưi ba klei bi mguôp hdră êlan kluôm ênŭm hŏng Việt Nam đĭ ti hnơ̆ng mrâo. Khua phŭn bruă ƀuăn rơ̆ng mtrŭt mđĭ dŭm phŭn, dhar bruă ti Argentina bi mguôp hŏng Việt Nam ba klei mjĕ giăm jing ƀĭng hgŭm leh anăn bi mguôp lu mta bruă plah wah Việt Nam hŏng Argentina ƀrư̆ hruê brư̆ klă klơ̆ng, mâo boh tŭ dưn, mđing truh kơ bruă mkŏ mjing klei mjĕ giăm hdră êlan hlăm dŭm mta bruă msĕ si pui kmlă leh anăn bruă lŏ hma kyua klei tŭ kơ mnuih ƀuôn sang 2 ala čar.

Pô mblang: Y-Ƀel Êban